വെളുത്ത കല്ലുകള്‍ക്കിടയില്‍ നഷ്ടപ്പെട്ട ചെറിയൊരു വെളുത്ത ഇയര്‍ബഡ്, ഫോട്ടോകള്‍ പരിശോധിച്ചുകൊണ്ട് കൃത്യമായി കണ്ടെത്തിക്കൊടുത്ത് ചാറ്റ്ജിപിടി. 10 മിനിറ്റോളം കല്ലുകള്‍ക്കിടയില്‍ പരതിയിട്ടും ഇയര്‍ബഡ് കണ്ടെത്താനാകാതെ വന്നതോടെയാണ് ഒരു യുവാവ് സഹായത്തിനായി ചാറ്റ്ജിപിടിയെ സമീപിച്ചത്.
വെള്ളിയാഴ്ച വൈകുന്നേരം പാര്‍ക്കില്‍ നിന്ന് മകനോടൊപ്പം മടങ്ങുന്നതിനിടയിലാണ് സംഭവം. ഓടിക്കൊണ്ടിരുന്ന മകനെ പിടികൂടാന്‍ ശ്രമിക്കുന്നതിനിടയില്‍ യുവാവിന്‍റെ ഹൂഡിയുടെ പോക്കറ്റില്‍ നിന്നു ഇയര്‍ബഡ് കേസ് താഴെ വീണു തുറന്നുപോകുകയും, അതിലുണ്ടായിരുന്ന ഇടത്തെ ഇയര്‍ബഡ് കല്ലുകള്‍ക്കിടയിലേക്ക് തെറിച്ചുവീഴുകയും ചെയ്തു. വെളുത്ത കല്ലുകളും വെളുത്ത ഇയര്‍ബഡും ഒരേപോലെയായതിനാല്‍ സൂര്യനസ്തമിക്കുന്ന ആ സമയത്ത് അത് കണ്ടെത്തുക ഏറെ പ്രയാസകരമായിരുന്നു.
ഒടുവില്‍, നിരന്തരമായ തെരച്ചിലിനൊടുവില്‍ ഫലം കാണാതെ വന്നപ്പോള്‍ യുവാവ് തന്‍റെ സ്മാര്‍ട്ട്‌ഫോണില്‍ ഫോട്ടോകള്‍ പകര്‍ത്തി ചാറ്റ്ജിപിടിക്ക് അയച്ചുകൊടുത്തു. കൂടുതല്‍ വ്യക്തതയ്ക്കായി അല്‍പ്പം കൂടി അടുത്തുനിന്നുള്ള ചിത്രങ്ങള്‍ അയക്കാന്‍ ചാറ്റ്ജിപിടി ആവശ്യപ്പെടുകയും, യുവാവ് അതുപോലെ ചെയ്യുകയും ചെയ്തു. ചിത്രം ലഭിച്ച് ഒരു മിനിറ്റിനുള്ളില്‍ത്തന്നെ ഇയര്‍ബഡ് കിടക്കുന്ന കൃത്യമായ സ്ഥലം അടയാളപ്പെടുത്തി ചാറ്റ്ജിപിടി തിരികെ നല്‍കുകയായിരുന്നു.
തന്‍റെ ഈ അനുഭവം യുവാവ് റെഡ്ഡിറ്റില്‍ പങ്കുവെച്ചതോടെ സംഭവം സോഷ്യല്‍ മീഡിയയില്‍ വൈറലായി. വലിയ കാര്യങ്ങള്‍ക്കും രചനകള്‍ക്കും ഗവേഷണങ്ങള്‍ക്കും മാത്രം ഉപയോഗിച്ചിരുന്ന ചാറ്റ്‌ബോര്‍ട്ടുകള്‍ക്ക് ദൈനംദിന ജീവിതത്തിലെ ചെറിയ പ്രശ്നങ്ങള്‍ പോലും പരിഹരിക്കാന്‍ സാധിക്കുമെന്ന് ഈ സംഭവം തെളിയിക്കുന്നുവെന്നാണ് ഉപയോക്താക്കളുടെ വിലയിരുത്തല്‍. എങ്കിലും, ചിത്രങ്ങളുടെ വ്യക്തതയും വെളിച്ചവുമൊക്കെ ഇത്തരം കാര്യങ്ങളില്‍ നിര്‍ണായകമാണെന്നും വിദഗ്ധര്‍ ചൂണ്ടിക്കാണിക്കുന്നു.
